“మీకు కొబ్బరి నీళ్ళు తాగడమంటే ఇష్టమా ? బహుశా మీరు తాజాగా ఉండే లేత కొబ్బరి తినడానికి మొగ్గు చూపుతారేమో. నేను ఈ ప్రాంతంలోనే మంచి లేత కొబ్బరి బోండాలు అమ్ముతాను. నేను 8 సంవత్సరాల నుండి విజయవాడ లో ఉంటున్నాను. మా స్వస్థలం తూర్పు గోదావరి జిల్లా అమలాపురం. బ్రతుకుదెరువుకోసం నేను ఈ ఊరికి వచ్చాను. నేను చేసే పని కొబ్బరి బోండాలు అమ్మడమే అయినా, నా పనంటే నాకిష్టం. నేను 10వ తరగతి దాకా చదువుకున్నాను.

నేను వారంలో ఏడు రోజులు, ఉదయం 9 గంటల నుంచి రాత్రి 8 గంటల వరకూ పని చేస్తాను. ఈ ప్రాంతాన్ని ఎంచుకోవడానికి కారణం ఏంటంటే, పక్కనే ఆఫీసులు, నివాస ప్రాంతాలు ఉన్నాయి కాబట్టి. దీంతో ఎక్కువ మంది కస్టమర్లు నా దగ్గరికి వస్తారు. స్టూడెంట్స్ దగ్గరి నుంచి, ఆఫిసులకి వెళ్ళేవాళ్ళ దగ్గరి నుంచి ముసలి వాళ్ళ వరకూ, వివిధ రకాల కస్టమర్ల నా దగ్గరికి వస్తారు. ఈ మధ్య వాళ్ళు నా దగ్గరికి ఎందుకు రావట్లేదో అర్థం కావట్లేదు. కొబ్బరి నీళ్లు ఆరోగ్యానికి మంచివి కూడా. రోగనిరోధకశక్తి పెంచడానికి డాక్టర్లు, పెద్దవాళ్ళు కూడా కొబ్బరి నీళ్ళు తాగమని చెప్తారు. రోజురోజుకీ, మార్కెట్ లో కొత్త కూల్ డ్రింక్స్ వస్తున్నా కూడా, కొబ్బరి నీళ్ళు ఆరోగ్యానికి చాలా మంచివి.

కొబ్బరి బోండాలు అమ్మడం లాభసాటి వ్యాపారం అనుకున్నాను. కానీ కోవిడ్-19 వల్ల జనాలు కొబ్బరి బోండాలు నా దగ్గర బోండాలు కొనడానికే భయపడే రోజు వస్తుందని ఎప్పుడూ అనుకోలేదు. ఈ సంవత్సరం, వ్యాపారం చేయడం చాలా కష్టం. కానీ, నేను చేయగలిగింది ఏముంది చెప్పండి?. నాకు తెలిసింది ఇదొక్కటే. చేయగలిగే ఓపిక ఉన్నంత వరకూ, ఈ వ్యాపారం చేస్తాను.”